Í kvöld hefst Íslandsmótið í handknattleik karla. Riðið verður á vaðið með þremur leikjum í Olísdeild karla sem allir hefjast klukkan 19.30. Þrír síðari leikir 1. umferðar fara fram á morgun, föstudag, og á laugardaginn. Keppni hefst í Olísdeild kvenna á laugardaginn. Fyrstu leikir í Grill 66-deildum karla og kvenna verða 22. og 23. september.
Mikil eftirvænting
Gríðarleg eftirvænting ríkir fyrir fyrstu leikjum Olísdeildar, ekki síst viðureign FH og Aftureldingar í Kaplakrika. Ræður mestu að Aron Pálmarsson, einn fremsti handknattleiksmaður samtímans, flutti heim í sumar og gekk til liðs við FH. Mikið verður um dýrðir af þessu tilefni í Kaplakrika.
Rétt er að minna þá á, sem ætla að mæta í Kaplakrika, að mæta í tíma. Þröng verður vafalaust á þingi, ekki síst á bílastæðum.
Í fyrsta sinn í 20 ár
Endurkoma Alexander Peterssonar í íslenskan handknattleik vekur skiljanlega einnig mikla athygli. Alexander verður í eldlínunni með Val sem tekur á móti nýliðum Víkings í Origohöllinni. Alexander hefur ekki leikið með félagsliði hér á landi í 20 ár og var hættur í handknattleik fyrir ári en ákvað í sumar að taka fram skóna á nýjan leik og hella sér í slaginn með Val.
Mættur í heimahagana
Þriðja stóra nafnið í íslenskum handknattleik sem verður í eldlínunni í kvöld með nýju félagi er Rúnar Kárason, besti leikmaður úrslitakeppninnar í vor. Rúnar gekk til liðs við uppeldisfélag sitt Fram í sumar. Miklar vonir eru bundnar við komu Rúnars í Úlfarsárdal eftir tvö frábær keppnistímabil með ÍBV.
Leikir kvöldsins
Olísdeild karla:
Kaplakriki: FH – Afturelding, kl. 19.30.
Úlfarsárdalur: Fram – Grótta, kl. 19.30.
Origohöllin: Valur – Víkingur, kl. 19.30.
Allir leikir Íslandsmótsins verða sendir út í gegnum Sjónvarp Símans – Handboltapassinn.
Tengt efni:
HSÍ boðar stórtækar breytingar í sjónvarps- og útbreiðslumálum
