Snorri Steinn Guðjónsson landsliðsþjálfari karla í handknattleik tilkynnir í dag sinn fyrsta landsliðshóp eftir að hann var ráðinn í landsliðsþjálfari um mitt ár. Framundan eru tveir vináttuleikir við Færeyinga hér á landi 3. og 4. nóvember. Í vikunni á undan verður landsliðshópurinn saman við æfingar, þeim fyrstu undir stjórn Snorra Steins.
Talsverð eftirvænting ríkir vegna valsins og hefur m.a. verið boðað til blaðamannafundar upp úr hádeginu af þessu tilefni.
Hópurinn sem Snorri Steinn tilkynnir um val á í dag mun gefa einhverja mynd af hvaða leikmenn hann mun hafa undir smásjá þegar kemur að því að því velja keppnishópinn fyrir Evrópumeistaramótið í Þýskalandi í janúar. Æfingar fyrir EM hefjast 26. desemember eins og kom fram í samtali Snorra Steins við handbolta.is fyrir nokkru.
Snorri Steinn hefur á undanförnum vikum farið um Evrópu, fylgst með í þeim leikjum og fundað með nokkrum þeirra.
Leikirnir við Færeyinga, sem fara fram í Laugardalshöll, verða einnig þeir einu hjá karlalandsliðinu áður en það tekur þátt í Evrópumótinu.
Færeyingar mæta til landsins með sína sterkustu sveit en gríðarlegur uppgangur er og hefur verið í færeyskum handknattleik á síðustu árum, jafnt í karla- sem kvennaflokki.
Við hlið Snorra Steins við þjálfun landsliðsins er Arnór Atlason þjálfari danska úrvalsdeildarliðsins TTH Holstebro.
Snorri Steinn ráðinn til þriggja ára – Arnór verður aðstoðarmaður
