Dagur Árni Heimisson skrifaði í dag undir nýjan tveggja ára samning við handknattleiksdeild KA og er nú samningsbundinn félaginu út tímabilið vorið 2026. Dagur Árni er að margra mati einn allra efnilegasti handboltamaður landsins. Hann er 17 ára gamall og hefur þrátt fyrir ungan aldur spilað 46 leiki fyrir meistaraflokkslið KA og er hvergi banginn við að taka að sér veigamikið hlutverk.
Dagur er uppalinn hjá KA en hann er hluti af hinum sterka 2006 árgangi KA en strákarnir töpuðu ekki leik í rúmlega tvö ár er þeir hömpuðu öllum þeim titlum sem í boði voru á Íslandi áður en þeir urðu Partille Cup meistarar í Svíþjóð sumarið 2022.
Þá hefur Dagur verið í yngri landsliðunum og látið til sín taka. Hann var valinn í úrvalslið Opna Evrópumótsins í Gautaborg síðasta sumar þegar U17 ára landsliðið hafnaði í fimmta sæti.
„Auk þess er Dagur með frábært hugarfar og er afar drífandi í kringum starf handknattleiksdeildar. Hann hlaut Böggubikarinn á 95 ára afmælisfögnuði KA á síðasta ári en hann er veittur einstakling sem þykir efnilegur í sinni grein en er ekki síður sterkur félagslega og er til fyrirmyndar á æfingum og í keppni,“ segir m.a. í tilkynningu KA í dag.
Dagur Árni er lykilpúsl
„Þetta eru enn einar frábæru fréttirnar af leikmannamálum hjá okkur. Við erum að byggja til framtíðar og Dagur Árni er lykilpúsl í liðinu okkar næstu árin,“ er haft eftir Halldóri Stefáni Haraldssyni þjálfara karlaliðs KA í sömu tilkynningu.
Dagur Árni verður í eldlínunni síðar í dag þegar KA og Víkingur mætast í 19. umferð Olísdeildar í KA-heimilinu. Vegurinn norður er opinn og ekkert til fyrirstöðu að Árni Snær Magnússon og Þorvar Bjarmi Harðarson flauti kröftulega til leiks klukkan 17.30 eins og ráðgert er.
Tengdar fréttir:
Arnór Ísak leikur áfram af krafti með KA næstu árin
Bjarni Ófeigur flytur heim og semur við KA til þriggja ára
Magnús Dagur hefur samið við KA til þriggja ára
Staðan og næstu leikir í Olísdeildum.
