Snorri Steinn Guðjónsson landsliðsþjálfari segir stöðuna á leikmönnum karlalandsliðsins almennt vera góða nú þegar styttist leikina við Eistlendinga í umspili um sæti á heimsmeistaramótinu. Leikirnir verða 8. og 11. maí og sá fyrri í Laugardalshöll en hinni síðari í Tallin.
„Það er langt liðið á tímabilið og það er ekki óeðlilegt þótt eitthvað sé að hrjá menn. Þeir sem eru meiddir eru Viktor Gísli, Stiven og Donni. Viggó hefur verið veikur en er að jafna sig og ætti að byrja að spila aftur fljótlega með sínu félagsliði. Aðrir eru klárir,“ segir Snorri Steinn og bætti við að mikilvægt væri að fá Þorstein Leó Gunnarsson inn í hópinn. Hann var ekki með í vináttuleikjum við Grikki í síðasta mánuði vegna meiðsla.
Þorsteinn Léo er nýlega kominn út á leikvöllinn aftur eftir axlarmeiðsli. „Ég sá hann spila á móti Stjörnunni þriðjudagkvöldið og þá gat hann skotið fast,“ segir Snorri Steinn sem telur Þorstein Leó eiga mikla möguleika í framtíðinni.
Nær vonandi að slá í gegn
Þorsteinn Leó er framtíðarmaður í landsliðinu. „Hann hefur eiginleika sem við höfum ekki séð lengi hjá landsliðsmanni. Þess vegna er mikilvægt að Þorsteinn sé mikið í kringum liðið. Á einhverjum tímapunkti, vonandi, nær hann að springa út og slá í gegn,“ segir Snorri Steinn Guðjónsson landsliðsþjálfari í handknattleik karla sem valdi í dag 18 leikmenn í landsliðshópinn fyrir viðureignirnar við Eistlendinga.
Nánar er rætt við Snorra Stein á myndskeiðinu efst í fréttinni.
Sjá einnig:
Í heimi þjálfarans eru engir leikir auðveldir
Aron, Bjarki Már og Þorsteinn Leó valdir í leikina við Eistlendinga
