„Við gerðum alltof marga tæknifeila, alls 13 í síðari hálfleik. Það er bara alltof dýrt,“ sagði Sigurjón Friðbjörn Björnsson þjálfari Gróttu eftir fjögurra mark tap fyrir Aftureldingu, 28:24, í fyrsta leiknum í úrslitum umspils Olísdeildar kvenna að Varmá í kvöld.
Okkur var refsað
„Okkur var refsað fyrir óagaðar ákvarðanir í sókninni svo hefðum við getað nýtt betur nokkur tækifæri sem við fengum, meðal annars fóru tvö vítaköst forgörðum. Fjögurra marka munur er ekki mikið þegar upp er staðið. Við höfum hinsvegar ekki tapað boltanum eins oft í einum leik á tímabilinu,“ sagði Sigurjón Friðbjörn ennfremur. Hann er hvergi banginn og lofar betri frammistöðu hjá Gróttuliðinu á fimmtudaginn á heimavelli.
Ekkert flókið
„Við eigum fullt erindi í þessa keppni. Ég fékk ekki betur séð. Við erum bara einum vinningi undir gegn góðu liði sem vann ÍBV í Eyjum fyrir ekki löngu síðan. Við mætum í næsta leik til að laga það sem þarf að laga og vinna. Ekki flóknara en það,“ sagði Sigurjón Friðbjörn Björnsson þjálfari Gróttu í samtali við handbolta.is að Varmá í kvöld.
Umspil Olís kvenna: leikjadagskrá og úrslit
