„Við byrjuðum mjög vel og vorum bara eina liðið á vellinum fyrstu 15 til 20 mínúturnar,“ sagði Ásdís Ágústsdóttir við handbolta.is eftir öruggan sigur Vals á ÍBV í fyrstu viðureign liðanna í undanúrslitum Olísdeildar kvenna í handknattleik á Hlíðarenda í kvöld, 28:22. Eins og Ásdís sagði voru yfirburðir Vals miklir framan af viðureigninni. Eftir 20 mínútur var staðan, 13:4, Val í vil.
„Okkur tókst sem betur fer að halda út leikinn þótt vissulega hafi Eyjaliðið komið til baka. Það varð eflaust jafntefli síðustu 40 mínúturnar,“ sagði Ásdís sem sagði ennfremur mikilvægt fyrir Valsliðið að það stóðst áhlaup ÍBV í upphafi síðari hálfleiks.
„Í einum leiknum við ÍBV í deildinni í vetur náðum við góðu forskoti en ÍBV náði okkur í síðari hálfleik. Við vildum alls ekki endurtaka þann leik. Þess vegna mættum við inn í síðari hálfleikinn staðráðnir í að halda einbeitingu og missa ekki niður forskotið,“ sagði Ásdís en staðan var 18:11 þegar fyrri hálfleikur var að baki.
„Fyrir okkur var fyrst og fremst mikilvægt að vinna fyrsta leikinn í einvíginu. Ná frumkvæðinu og fara með sjálfstraust til Eyja í leik tvö á föstudaginn. Við förum í alla leiki til að vinna,“ sagði Ásdís Ágústsdóttir leikmaður Vals í samtali við handbolta.is í N1-höllinni í kvöld.
Sjá einnig: