Vellir Sportbar, sem er til húsa á Hótel Völlum í Hafnarfirði, hefur ákveðið að styrkja yngri leikmenn handknattleiksdeildar Hauka í handbolta, sem valdir hafa verið og fara í verkefni U20 og U18 EM karla og U20 og U18 HM kvenna í sumar. Fær hver leikmaður 75 þúsund króna styrk frá Vellir Sportbar.
„Mjög svo rausnarlegt framtak hjá nágrönnum okkur á Vellir Sportbar og þökkum við þeim kærlega fyrir. Það er óskandi að fleiri fyrirtæki fylgi í kjölfarið og styðji við bakið á þessum framtíðarhetjum og fyrirmyndum bæjarins sem keppa fyrir hönd Íslands.
Við hvetjum alla stuðningsmenn Hauka að leggja leið sína á Velli Sportbar, en þar eru reglulega beinar útsendingar frá stórleikjum í fjölmörgum íþróttagreinum og veitingar við hæfi hvers og eins,“ segir í tilkynningu frá handknattleiksdeild Hauka sem handbolti.is er ljúft að birta.
Útgefandi handbolti.is tekur heilshugar undir hvatningu handknattleiksdeildar Hauka. Vellir sportbar er einn traustasti bakhjarl handbolti.is og hefur auglýst í hverjum mánuði um langt skeið, jafnt að sumri sem vetri, hausti og vori.
Eins og komið hefur fram í fréttum, m.a. á handbolti.is, verður hver leikmaður yngri landsliða Íslands að safna allt að 600 þúsund krónum til þess að taka þátt í heims- og Evrópumótum sem standa fyrir dyrum í sumar.
