Brasilíska handknattleikskonan Nathalia Soares Baliana sem leikið hefur með KA/Þór síðustu tvö tímabil hefur samið við félagslið í Portúgal og verður þar með ekki áfram hér á landi. KA/Þór féll úr Olísdeildinni í vor og verður þar af leiðandi eitt af liðunum í Grill 66-deildinni þegar Íslandsmótið hefst í september.
Baliana fékk leikheimild með KA/Þór í byrjun október 2022. Hún lék 40 leiki í Olísdeildinni og skoraði 183 mörk. Baliana var ein helsta skytta liðsins í þessu tvö ár. Víst er að Baliana þekkir til í Portgúal eftir að hafa leikið með Maiastars þar í landi fyrir komuna til KA. Hvort hún gengur á ný til liðs við Maiastars hefur handbolti.is ekki upplýsingar um.
Nýr þjálfari tók við KA/Þór í sumar, Jónatan Þór Magnússon, eftir að Arna Valgerður Erlingsdóttir hætti til að einbeita sér að framhaldsnámi.
