„Það gefur auga leið að varnarleikurinn var ekki til staðar í kvöld, það var hreint skelfilegt að sjá. Við fengum á okkur 21 mark í síðari hálfleik, þá er rosalega erfitt að vinna,“ sagði Ásgeir Örn Hallgrímsson þjálfari Hauka daufur í dálkinn þegar handbolti.is hitti hann að máli eftir tap Hauka fyrir Fram, 37:34, í Olísdeild karla í kvöld. Leikurinn fór fram í Lambhagahöll Framara í Úlfarsárdal.
„Fyrri hálfleikur var ekkert slæmur af okkar hálfu. Við gáfum Frömurum boltann full auðveldlega í nokkur skipti í hálfleiknum en löguðum það og komum til baka eftir að hafa lent undir. Þegar kom fram í síðari hálfleik þá vörðumst við bara ekki. Þar með er hægt að gleyma því að vinna,“ sagði Ásgeir Örn sem horfir á þá staðreynd að Haukar hafa þar með tapað tveimur leikjum í röð.
„Þetta er erfitt. Við ætluðum að rífa okkur aðeins upp í kvöld og sýna góðan karakter og vinna þennan leik. Þegar vörnin er ekki fyrir hendi þá er ekki hægt að ætlast til þess að vinna,“ sagði Ásgeir Örn Hallgrímsson þjálfari Hauka sem eru ásamt Fram og Gróttu í öðru til fjórða sæti með sex stig í Olísdeildinni. Haukar hafa leikið einum leik fleira en hin liðin tvö.
Reynir Þór stjórnaði flugeldasýningu Framara í síðari hálfleik
Sóknarleikurinn var stórkostlegur í 60 mínútur
Staðan í Olísdeildum og næstu leikir.
