Ennþá er möguleiki á að tryggja sér aðgöngumiða með milligöngu HSÍ á leiki íslenska landsliðsins á heimsmeistaramótinu í handknattleik kvenna. Fyrsti leikurinn fer fram 30. nóvember í Stavangri eins og hinar tvær viðureignirnar í riðlakeppni mótsins.
Í tilkynningu frá HSÍ segir að sambandið geri lokapöntun á miðum á föstudaginn. „Ef að þú ætlar að fylgja liðinu og átt eftir að tryggja þér miða þá svarar Kjartan Vídó öllum fyrirspurnum í netfanginu kjartanv@hsi.is varðandi miðasöluna,“ segir orðrétt í tilkynningunni.
Leikir Íslands í riðlakeppni HM - leikstaður er Stavangur. 30. nóvember: Ísland – Slóvenía, kl. 17. 2. desember: Ísland – Frakkland, kl. 17. 4. desember: Ísland – Angóla, kl. 17.
Ísland tekur í fyrsta sinn þátt í heimsmeistaramóti kvenna í 12 ár. Lokaundirbúningur hefst um næstu helgi. Keppnishópurinn var valinn á dögunum. Nálgast má upplýsingar um hverjar skipa landsliðið á HM í fréttinni hér fyrir neðan.
Arnar valdi 18 leikmenn fyrir HM – ein úr HM-hópnum 2011
