Stórskytta Aftureldingar, Þorsteinn Leó Gunnarsson, rakst á Hergeir Grímsson leikmann Stjörnunnar snemma í viðureign Stjörnunar og Aftureldingar í Olísdeild karla í handknattleik í TM-höllinni í kvöld með þeim afleiðingum að Þosteinn fékk högg á höfuðið. Þorsteinn Leó kom ekkert meira við sögu í leiknum.
Haka Þorsteins skall í höfuðið á Hergeiri, eftir því sem næst verður komist.
Hergeir lék út fyrri hálfleikinn en var ekkert með í síðari hálfleik en ekki er handbolta.is ljóst hvort það var vegna árekstursins við Þorstein eða af öðrum ástæðum.
Ekki er langt síðan Þorsteinn Leó hlaut talsvert höfuðhögg í leik með Aftureldingu gegn Gróttu á Varmá. Varð hann af nokkrum leikjum fyrir vikið. Óvíst er í kvöld hversu lengi Þorsteinn Leó verður frá vegna höggsins sem hann varð fyrir í kvöld.
Afturelding á tvo leiki eftir fram að jólaleyfi, gegn Val á heimavelli í Olísdeildinni á föstudaginn og á móti HK í 16-liða úrslitum bikarkeppninnar fimmtudaginn 15. desember.
Þorsteinn Leó var á dögunum útnefndur leikmaður Olísdeildar karla í nóvembermánuði af tölfræðiveitunni HBStatz.
