Aftur hefur greinst covidsmit innan liðs heimsmeistara Dana. Að þessu sinni hjá Mads Mensah, eftir því sem fram kemur í tilkynningu danska handknattleikssambandsins í morgun. Mensah hefur verið einangraður frá hópnum meðan frekari rannsóknir fara fram.
Það sem skýtur Dönum skelk í bringu er að Mensah hefur verið herbergisfélagi Mikkel Hansen síðustu daga. Hansen fékk á hinn bóginn neikvæða niðurstöðu úr prófi sem hann gekkst undir í gær á sama tíma og Mensah og aðrir í danska hópnum.
Danska liðið fór allt í PCR próf í gær en það er skilyrði að fara í slíkt a.m.k. 72 klukkustundum og sýna fram á neikvæða niðurstöðu áður komið er á leikstað. Danska landsliðið fer yfir Eyrarsundsbrúna til Malmö annað kvöld. Fyrsti leikur Dana á HM verður við Belga á föstudaginn í Malmö Arena.
Eins og í tilfelli Simon Pytlick í síðustu viku vonast Danir til að um sé að ræða gamalt smit hjá Mensah. Frekari rannsóknir munu leiða í ljós hvort svo verður en sem stendur er líklegt að Mensah verði ekki með danska landsliðinu á föstudaginn gegn Belgum.
Allt er í grænum sjó hjá íslenska landsliðinu eins og kom fram í frétt handbolta.is í morgun.
