„Það var svekkjandi að ná ekki að halda þessu í jöfnum leik því það voru tækifæri til þess. Þriggja marka tap er alls ekki óvinnandi vegur og við teljum okkur eiga bullandi séns í síðari leikinn á sunnudaginn,“ sagði Gunnar Magnússon þjálfari Aftureldingar þegar handbolti.is heyrði stuttlega í honum fyrir stundu eftir þriggja marka tap Aftureldingar, 27:24, í fyrri viðureigninni við Tatran Presov í 32-liða úrslitum Evrópubikarkeppninnar í kvöld.
Tveir erfiðir kaflar
Leikurinn fór fram í Slóvakíu eins og sá síðari sem hefst klukkan 17 á sunnudaginn. „Það voru tveir erfiðir kaflar hjá okkur, framan af fyrri hálfleik og í upphafi síðari hálfleiks. Við gerðum hinsvegar vel að koma til baka í síðari helmingi síðari hálfleiks. Það var meira að segja möguleiki að ná muninum niður í tvö mörk,“ sagði Gunnar sem telur Aftureldingarliðið eiga helling inni, ekki síst í sóknarleiknum fyrir síðari viðureignina.
Eiga inni í sókninni
„Við fórum illa með góð marktækifæri, ekki síst úr hornunum. Það eru möguleikar á framförum hjá í sóknarleiknum. Tatran er með hörkulið en við teljum alls ekki ógerlegt að snúa taflinu við auk þess sem leikirnir eru kærkomin og góð reynsla fyrir okkur,“ sagði Gunnar Magnússon þjálfari Aftureldingar.
Fengu flottan stuðning
Fjölmennur hópur Íslendinga var á leiknum í Slóvakíu. Auk nokkurra Mosfellinga sem slógust með í förina til Slóvakíu þá mætti vaskur og fjölmennur hópur íslenskra námsmanna í Slóvakíu á leikinn. Drógu þeir hvergi af sér við að hvetja Aftureldingarliðið til dáða og munaði svo sannarlega um minna að sögn Gunnars Magnússonar þjálfara Aftureldingar.
Tölfræði og fleira um leikinn er að finna í greininni fyrir neðan:
