FH mætir gríska liðinu AC Diomidis Argous í fyrstu umferð í Evrópubikarkeppninni í handknattleik og hafa FH-ingar ákveðið að leika báða leikina í Grikklandi, 16. og 17. september.
FH-ingar geta fengið upplýsingar um ferðir, allar aðstæður og andrúmsloft hjá Haukum, en það var verkefni Hauka í fyrstu umferð EHF Cup 2016-2017 að fara til Grikklands og glíma við leikmenn Argous. Þeir léku báða leikina úti, eins og FH-ingar ætla að gera og unnu 33:26 og 28:20.
Guðmundur Árni Ólafsson skoraði 7 mörk í fyrri leiknum, en 6 mörk í síðari leiknum, en þá skoruðu 12 leikmenn Hauka. Adam Haukur Baumruk skoraði 6 mörk í fyrri leiknum.
Gunnar Magnússon hafði þetta að segja fyrir leikina í Morgunblaðinu, þegar hann var spurður um aðstæður: „Við vorum að koma af æfingu. Aðstæðurnar eru svolítið erfiðar. Gólfið í höllinni er ekkert sérstakt. Það er ekki alveg slétt en við höfum spilað á betra gólfi. Við lögum okkur bara að því.“
Gunnar sagði að Argous væri eitt besta lið Grikklands. „Við vitum töluvert um þá, skoðuðum marga leiki hjá þeim á síðasta tímabili. Liðið er erfitt heim að sækja; á sterkan heimavöll.“
Gunnar sagði þetta eftir seinni leikinn: „Þeir voru eiginlega sprungnir á limminu í seinni leiknum og greinilegt að fyrri leikurinn tók meiri orku frá þeim en okkur. Við notuðum fleiri leikmenn en þeir í fyrri leiknum og vorum ferskari í þeim seinni.“
Tengdar fréttir:
Evrópukeppni félagsliða
