Ýmir Örn Gíslason og liðsfélagar í Rhein-Neckar Löwen standa vel að vígi eftir fimm marka sigur á RK Nexe, 24:19, í fyrri viðureign liðanna í útsláttarkeppni Evrópudeildarinnar í handknattleik karla í kvöld. Leikurinn fór fram í Króatíu og því á Löwen góða möguleika á sæti í átta liða úrslitum þar sem liðið á heimaleikinn eftir.
Jannik Kohlbacher og Tobias Reichmann skoruðu sjö mörk hvor fyrir Rhein-Neckar Löwen. Marguc Gal skoraði fjögur mörk fyrir Nexe.
Fjögurra marka sigur hjá Heiðmari
Annað þýskt lið, Hannover-Burgdorf með Heiðmar Felixson í stóli aðstoðarþjálfara, vann sænsku meistarana í Sävehof, 34:30, í Hannover, sömuleiðis í fyrstu umferð útsláttarkeppninnar. Tryggvi Þórisson var í liði Sävehof í kvöld. Hann skoraði ekki mark, ekkert fremur en Ýmir Örn fyrir Rhein-Neckar Löwen í sigrinum góða í Króatíu.
Svíinn Jonathan Edvardsson var markahæstur hjá Hannover-Borgdorf með átta mörk og Ilija Brozovic var næstur með sex mörk. Gustaf Wedberg skoraði 11 mörk fyrir Sävehof.
Fyrri í kvöld vann Füchse Berlin liðsmenn Kadetten Schaffhausen, 32:28, og Dinamo Búkarest lagði danska liðið Bjerringbro/Silkeborg, 37:34, í Búkarest eins og kom fram hér.
Nantes, Sporting, Flensburg og Skjern unnu sína riðla í 16-liða úrslitum og sitja yfir í fyrstu umferð útsláttarkeppninnar en mæta til leiks í átta lið úrslitum.
