Halldór Jóhann Sigfússon hefur tekið við sem aðalþjálfari danska úrvalsdeildarliðsins TTH Holstebro og stýrir liðinu út keppnistímabilið. Søren Hansen, sem verið hefur aðalþjálfari, tekur við hlutverki Halldórs Jóhanns sem aðstoðarþjálfari.
Félagið tilkynnti þetta í morgun og sagði ákvörðunina byggða á óhagstæðum úrslitum í síðustu sex leikjum. Af þeim hafa fimm tapast og einum lokið með jafntefli. Markmiðið er að ná einu af átta efstu sætum úrvalsdeildarinnar og komast í úrslitakeppnina um danska meistaratitilinn. Næsti leikur verður við SønderjyskE á útivelli á miðvikudaginn.
Holstebro-liðið á fimm leiki eftir í deildinni.
Hörð barátta um 8. sætið
TTH Holstebro er í áttunda sæti deildarinnar sem stendur með 18 stig eftir 21 leik. Skanderborg Aarhus Håndbold er með 22 stig eftir 20 leiki í sjötta sæti og Fredericia Håndboldklub 20 stig í sjöunda sæti að loknum 20 leikjum. Ribe-Esbjerg er síðan í níunda sæti með 18 stig en hefur lokið 20 leikjum, einum færra en TTH Holstebro.
Halldór Jóhann var ráðinn til TTH Holstebro á síðasta sumri til eins árs eftir miklar hrakfarir liðsins sem nærri var fallið úr úrvalsdeildinni. Hann var um áramótin ráðinn þjálfari Nordsjælland frá og með komandi sumri.
Síðasta sumar var tilkynnt að Arnór Atlason, aðstoðarþjálfari Aalborg Håndboold taki við þjálfun TTH Holstebro í sumar.
