„Þetta er svolítið eins og bjóða í afmælisveislu. Það er búið að bjóða fullt af fólki og mega stemning. Afmælisbarnið mætir rétt í byrjun en er síðan ekkert með í partíinu,“ sagði Teddi Ponsa í nýjasta þætti Handkastsins um tíða fjarveru Arons frá leikjum FH-inga fram til þessa en meiðsli hafa sett í strik í þátttöku hans.
„Enginn Aron Pálmarsson. Hann er meiddur í baki og skiljanlega enginn séns tekinn,“ segir Teddi Ponsa ennfremur í þættinum eftir leikina fimm í Olísdeild karla í handknattleik sem fram fór í gærkvöld.
Ferskt Handkast fór í kjölfarið í loftið þar sem Styrmir Sigurðsson og Atli Már Báruson, öðru nafni læðan, láta gamminn geysa auk Tedda sem heldur styrkum höndum um stjórn þáttarins í fjarveru sérfræðingsins.
Talsvert er skeggrætt um fjarveru Arons í nýjasta þætti Handkastsins og sýnist sitt hverjum. Umræðan hefst eftir fimm mínútur og á ný eftir liðlega 11 mínútur.
Hefði áhyggjur sem Framari
„Ef ég væri Framari hefði ég áhyggjur eftir fyrstu fimm leikina. Besti leikur liðsins að mati Einars þjálfara er tapleikur við Val. Staðan er ekki endilega góð ef tapleikur er besti leikur liðs af fimm mögulegum,“ sagði Styrmir um átta mark tap Fram á heimavelli fyrir FH-ingum án Arons, 32:24.
