Markvörðurinn öflugi, Ólafur Rafn Gíslason, hefur skrifað undir nýjan tveggja ára samning við handknattleiksdeild ÍR. Ólafur Rafn var einn besti markmaður deildarinnar og endaði með flest varin skot allra markmanna í vetur.
Í samantekt HBStatz kemur fram að Ólafur Rafn varði 29,1% skota sem á mark hans kom. Ekki síst óx honum ásmegin þegar leið á keppnistímabilið og átti hann nokkra stórleiki, m.a. þegar ÍR vann Stjörnuna í 19. umferð.
Ólafur Rafn gekk til liðs við ÍR haustið 2020. Í upphafi var hann lánsmaður hjá félaginu en síðar náðist samkomulag um varanleg félagaskipti Ólafs Rafns yfir í raðir ÍR-inga frá Stjörnunni.
„Við ÍR-ingar erum gríðarlega ánægðir með að Óli verði áfram innan okkar raða,“ segir í tilkynningu frá handknattleiksdeild ÍR í kvöld þar sem einnig kemur fram að fleiri fréttir berist úr herbúðum deildarinnar á næstu dögum.
