Selfyssingurinnn Teitur Örn Einarsson er orðaður við þýska handknattleiksliðið Gummersbach á instagramsíðu handball leaks. Oftar en ekki er fótur fyrir sögusögnum á handball leaks eins og kom síðast í ljós í dögunum þegar sagt var frá væntanlegum vistaskiptum Ýmis Arnar Gíslasonar áður en opinberað var um samning hans við Göppingen.
Um nokkurt skeið hefur legið fyrir að Teitur Örn kveður Flensburg næsta sumar og af þeirri ástæðu væri hann að horfa í kringum sig.
Eins og kom fram á handbolti.is á síðasta laugardag hefur Teitur Örn úr nokkrum tilboðum að velja frá þýsku og dönskum félagsliðum. M.a. kom fram að Teitur Örn hafi rætt við Guðjón Val Sigurðsson þjálfara Gummersbach og þjálfara ársins í Þýskalandi á síðustu leiktíð.
Færsla handball leaks um meintan samning Teits Arnar við Gummersbach er frá því í gær.
Auk Guðjóns Vals er Elliði Snær Viðarsson í herbúðum Gummersbach en liðið situr í 7. sæti 1. deildar og mætir MT Melsungen í kvöld í 17. umferð.
