Handknattleikskonan Lena Margrét Valdimarsdóttir er undir smásjá þýska 1. deildarliðsins HSG Bad Wildungen Vipers, samkvæmt heimildum handbolta.is. Hún mun hafa verið í heimsókn hjá félaginu í Þýskalandi á dögunum til að líta á aðstæður. Eftir því sem næst verður komist hefur Lenu Margréti ekki borist tilboð frá félaginu ennþá.
Lena Margrét skrifaði í apríl undir samning við Selfoss. Áður en að því kom hafði vaknað áhugi hjá forráðamönnum HSG Bad Wildungen Vipers fyrir Lenu Margréti. Eftir að ljóst varð að Selfoss héldi ekki sæti sínu í Olísdeildinni, eins og vonir stóðu til, var möguleikinn hjá þýska liðinu skoðaður á nýjan leik, samkvæmt heimildum handbolta.is
Lena Margrét, sem er örvhent skytta og ágætur varnarmaður, lék upp yngri flokka og upp í meistaraflokk með Fram. Hún skipti yfir til Stjörnunnar fyrir tveimur árum. Samningur hennar við Stjörnuna rann út í lok leiktíðar.
Lena Margrét skoraði 109 mörk í 21 leik í Olísdeildinni í vetur og 39 mörk í sjö leikjum í úrslitakeppninni.
Í mars var Lena Margrét kölluð inn í landsliðið sem mætti B-landsliði Noregs í tveimur vináttuleikjum á Ásvöllum.
HSG Bad Wildungen Vipers situr í 11. sæti af 14 liðum þýsku 1. deildarinnar þegar ein umferð er eftir óleikin.
