„Fáir hefðbundir miðar eru eftir á leikinn en allir VIP-miðarnir uppseldir. Þeir hurfu eins og dögg fyrir sólu. Það verður uppselt á leikinn og ljóst að við verðum vitni að flottasta handboltaleik sem farið hefur fram hér á landi þegar Flensburg-liðið mætir í umgjörðina stórglæsilegu í Origohöllinni,“ sagði Jón Halldórsson stjórnarmaður í handknattleiksdeild Vals í samtali við handbolta.is spurður um hvernig miðasala gangi á næsta leik Vals í Evrópudeildinni, þegar Teitur Örn Einarsson og félagar í þýska stórliðinu Flensburg-Handewitt stíga inn á keppnisgólf Origohallarinnar.
„Miðasalan hefur gengið afar vel og aðeins örfáir miðar eru eftir. Rétt er fyrir þá sem enn eiga eftir að tryggja sér miða að gera það áður en það verður um seinan,“ sagði Jón ennfremur.
Ljóst er að vel á annað þúsund áhorfendur verða á heimaleiknum við Flensburg eða eins og Origohöllin rúmar.
Efstu liðin mætast
Valsliðið hefur farið frábærlega af stað í Evrópudeildinni með tveimur sigrum, gegn FTC frá Ungverjalandi í Origohöllinni 25. október og á Benidorm á útivelli í síðustu viku. Fyrir vikið er Valur í efsta sæti B-riðils með fjögur stig eins og Flensburg-Handewitt.
Runnu út eins og lummur
Miðasala á leikinn gegn Flensburg tók mikinn kipp strax eftir leikinn við FTC og að loknum sigrinum á Benidorm runnu miðarnir út úr miðasölukerfi tix.is eins og verið væri að selja rjúkandi heitar lummur með súkkulaðikremi.
Að loknum heimaleiknum við Flensburg taka við tveir leikir með viku millibili á útivelli, gegn PAUC í Frakklandi 29. nóvember og FTC í Búdapest 6. desember.
Lífleg sala á þar næsta heimaleik
Jón sagði ennfremur að margir miðar hafi þegar selst á heimaleikinn gegn sænska meistaraliðinu Ystads 13. desember sem verður síðasta leikur Vals í keppninni á árinu.
Lokaspretturinn, fjórir leikir á fjórum vikum verða í febrúar að loknu heimsmeistaramótinu.
Miðasala á heimaleiki Vals í Evrópudeildinni.
