Miðasala á fjórða úrslitaleikinn hefst í kvöld

Opnað verður fyrir miðasölu klukkan 20 í kvöld á fjórða úrslitaleik Aftureldingar og FH um Íslandsmeistaratitilinn í handknattleik karla. Að vanda fer miðasalan fram í gegnum stubb.is.

Leikurinn fer fram á miðvikudaginn og verður hiklaust flautað til leiks klukkan 19.40. Troðfullt hús var að Varmá á síðasta miðvikudag þegar liðin reyndu með sér. Í ljósi þeirrar reynslu og aðsóknar á alla þrjá leiki liðanna til þessa má telja næsta víst að aðgöngumiðarnir verði rifnir út þegar stubbur opnar fyrir sölu sína í kvöld.

Staðan í einvíginu er sú að FH hefur unnið tvær viðureignir, Afturelding eina. FH vantar þar af leiðandi einn sigur til viðbótar til að vinna titilinn.