Molakaffi: bikarmeistari, Haukur, Guðmundur, Einar, Dana, Tryggvi

• Nantes, liðið sem Viktor Gísli Hallgrímsson landsliðsmarkvörður í handknattleik leikur með, varð í gærkvöld franskur bikarmeistari í handknattleik í þriðja sinn í sögu sinni. Nantes vann stórlið PSG, 31:23, í úrslitaleik í Bercy-íþróttahöllinni í París. Í fjarveru Viktors Gísla af leikvellinum, hann er frá keppni vegna meiðsla, var Ivan Pesic frábær í marki Nantes í úrslitaleiknum meðan markverðir PSG náðu sér alls ekki á strik. 

Nantes, vainqueur de la Coupe de France 🏆🇫🇷 2️⃣0️⃣2️⃣4️⃣ pic.twitter.com/ab07msZO8c

— HandNews (@HandNewsfr) April 21, 2024

• Haukur Þrastarson skoraði fjögur mörk þegar lið hans, Industria Kielce, vann KGHM Chrobry Głogów, 30:22, á útivelli í fyrri leik liðanna í undanúrslitum úrslitakeppni pólsku úrvalsdeildarinnar í gær. Leikurinn fór fram á heimavelli KGHM Chrobry Głogów en liðið hafnaði í fjórða sæti pólsku úrvalsdeildarinnar. Næst mætast liðin á heimavelli deildarmeistaranna í Kielce á laugardaginn.

• Fredericia HK, liðið sem Guðmundur Þórður Guðmundsson þjálfar, tapaði öðru sinni í úrslitakeppni dönsku úrvalsdeildarinnar í gær. Að þessu sinni tapaði liðið í heimsókn til Skjern, 31:30. Lasse Mikkelsen skoraði sigurmarkið úr vítakasti 10 sekúndum fyrir leikslok. Leikmenn Fredericia HK náðu einni sókn á lokasekúndunum en tókst ekki að skora, skot fór framhjá marki Skjern auk þess sem dæmdur var ruðningur.
  Einar Þorsteinn Ólafsson skoraði eitt mark fyrir Fredericia HK í afar jöfnum og spennandi leik.

• Í sama riðli vann GOG lið Ringsted, 39:31, og náði öðru sæti riðilsins á eftir Skjern sem hefur sex stig. GOG er með fimm en Ringsted og Fredericia HK hafa fjögur stig hvort. Tvær umferðir eru eftir og því eru möguleikar enn fyrir hendi hjá Guðmundi og félögum að krækja í undanúrslitasæti. 

• Dana Björk Guðmundsdóttir skoraði tvö af mörkum Volda þegar liðið vann Flint Tønsberg, 26:21, í Tønsberg í gær í 26. og síðustu umferð norsku 1. deildarinnar, þeirrar næst efstu. Liðin höfðu sætaskipti við þessi úrslit. Volda lauk keppni í öðru sæti, stigi fyrir ofan Flint Tønsberg. Haslum varð efst með 44 stig og fer beint upp úrvalsdeildina. Volda og Flint Tønsberg taka þátt í umspili um sæti í úrvalsdeildinni. 

• Tryggvi Þórisson skoraði eitt mark þegar IK Sävehof vann stórsigur á IFK Kristianstad, 33:23, á heimavelli í fyrstu viðureign liðanna í undanúrslitum sænsku úrvalsdeildarinnar í handknattleik á föstudagskvöld. Næsti leikur liðanna verður í Kristianstad á föstudaginn.