- Auglýsing -
- Michael Damgaard skoraði sjö mörk fyrir danska landsliðið þegar það lagði norska landsliðið, 27:24, á fjögurra þjóða æfingamóti í handknattleik karla í Arendal í Noregi í gærkvöld. Rasmus Lauge skoraði fjögur mörk fyrir Dani. Mikkel Hansen lék sinn fyrsta leik fyrir danska landsliðið síðan í lok janúar að Danir unnu heimsmeistaratitilinn. Hansen skoraði eitt mark. Sander Sagosen skoraði sex mörk fyrir norska landsliðið og Henrik Jakobsen fimm mörk.
- Spánverjar lögðu Hollendinga, 39:28, á fjögurra þjóða mótinu í Arendal í gær. Adria Figueras Trejo var markahæstur Spánverja með sex mörk. Kay Smits var atkvæðamestur Hollendinga með fimm mörk. Luc Steins var næstur með fjögur mörk.
- Ekki verður leikið á mótinu í Arendal í dag. Önnur umferð fer fram á morgun og þriðja og síðasta umferðin á sunnudaginn.
- Finnska landsliðið í handknattleik karla lagði landslið Bretlands, 25:16, á fyrsta stigi forkeppni HM 2025 í Motherwell í Skotlandi í gær. Þetta var fyrsti heimaleikur breska landsliðsins frá Ólympíuleikunum í London fyrir rúmum 11 árum. Eins og kom fram á handbolti.is í gær þá varð Þorsteinn Gauti Hjálmarsson að draga sig út úr finnska landsliðinu fyrir leikinn vegna meiðsla. Hann verður heldur ekki með í síðari viðureigninni sem fram fer í Karis í Finnlandi á morgun.
- Slóvakar unnu Kósovóa, 33:23, í forkeppninni HM 2024 í gær á heimavelli. Eistlendingar lögð Letta, 30:29, í Lettlandi. Ísfirðingarnir Endijs Kusners og Raivis Gorbunovs skoruðu samanlagt 10 mörk fyrir lettneska landsliðið í leiknum.
- Meðal vináttuleikja sem fram fóru í handknattleik karla í gærkvöld má nefna að Evrópumeistarar Svía unnu Úkraínumenn, 46:26. Túnisbúar lögðu Sviss, 31:22, og Austurríki lagði Portúgal frekar óvænt, 34:27.
- Svartfellingar, sem verða með Íslendingum í riðli á EM í Þýskalandi í janúar, unnu Rúmena, 38:28, í vináttuleik í gærkvöld. Rúmenar taka einnig þátt í EM í janúar. Verða þeir með í fyrsta sinn í lokakeppni EM í nærri þrjá áratugi.
- Á Facebook-síðu danska úrvalsdeildarliðsins Nordsjælland Håndbold var sagt frá því gær að Halldór Jóhann Sigfússon hafi verið ráðinn þjálfari U20 ára landsliðs Íslands í handknattleik karla. Halldór Jóhann starfar samhliða áfram fyrir danska liðið. Fram kemur að samningur Halldórs Jóhanns við HSÍ gildi frá til ársins 2025, þ.e. væntanlega fram yfir heimsmeistaramót 21 árs landsliða sem fram fer í Póllandi í júlí það ár. Halldór Jóhann mun starfa með Einari Andra Einarssyni sem þjálfað hefur U20/21 árs landsliðin undanfarin ár.
- Auglýsing -
