- Auglýsing -
- Elvar Örn Jónsson skoraði átta mörk og átti eina stoðsendingu og Arnar Freyr Arnarsson skoraði eitt mark og lék talsvert með í vörninni þegar lið þeirra, MT Melsungen, tapaði með tveggja marka mun fyrir Stuttgart, 33:31, í þýsku 1. deildinni í handknattleik í gærkvöld. Leikurinn fór fram í Stuttgart. Melsungen er í fimmta sæti deildarinnar með 29 stig að loknum 22 leikjum. Stöðuna í þýsku 1.deildinni og í fleiri deildum evrópsks handknattleiks er að finna hér.
- Fredrikstad Bkl., liðið sem Elías Már Halldórsson þjálfar, vann Tertnes, 32:27, í norsku úrvalsdeildinni í kvennaflokki á útivelli í gær. Fredrikstad Bkl er í þriðja sæti deildarinnar með 29 stig að loknum 20 leikjum, sjö stigum á eftir Storhamar er sem í öðru sæti. Stöðuna í norsku úrvalsdeildinni og í fleiri deildum evrópsks handknattleiks er að finna hér.
- Eins og reiknað var með þegar Michael Suter var leystur frá störfum þjálfara karlalandsliðs Sviss í handknattleik í upphafi þessa mánaðar fimm mánuðum áður en samningur hans rann út þá tekur Andy Schmid við starfi landsliðsþjálfara 1. mars eða nokkrum mánuðum fyrr en til stóð. Schmid hefur skrifað undir samning um þjálfun landsliðsins fram yfir EM í janúar 2028 sem fram á að fara í Sviss, á Spáni og í Portúgal. Hans aðstoðarmenn verða Thomas Zimmermann og Miloš Cuckovic.
- Sænska handknattleikskonan Emma Olsson sem varð Íslandsmeistari með Fram vorið 2022 hefur framlengt samning sinn við Borussia Dortmund fram til loka leiktíðar 2025. Olsson kom til Dortmund frá Fram sumarið 2022 og líkar vel hjá þýska liðinu sem situr í fjórða sæti 1. deildar.
- Boris Rojević þjálfari Vojvodina í Novi Sad er sagður verða næsti þjálfari karlandsliðs Serbíu. Rojević hefur náð mjög góðum árangri með Vojvodina á síðustu árum. Fyrir utan að vera með besta karlaliðið í Serbíu vann Vojvodina Evrópubikarkeppnina á síðasta keppnistímabili og hefur gert það gott í Evrópudeildinnni í vetur og er á meðal þeirra liða sem leika um þessar mundir í 16-liða úrslitum. Rojević þekkir aðeins til landsliðsins vegna þess að hann var aðstoðarmaður Toni Gerona á EM 2022. Gerona var sagt upp eftir EM í síðasta mánuði.
- Auglýsing -
