- Auglýsing -
- Orri Freyr Þorkelsson og félagar í Sporting unnu Benfica í úrslitaleik Meistarakeppninnar í Portúgal í gær, 37:21. Orri Freyr hefur átt í meiðslum í ökkla og kom lítið við sögu en var engu að síður á leikskýrslu. Stiven Tobar Valencia skoraði ekki mark fyrir Benfica.
- Haukur Þrastarson varð deildarbikarmeistari í Rúmeníu í gær með Dinamo Búkarest þegar liðið vann Minaur Baia Mare, 37:29, í úrslitaleik. Haukur skoraði fjögur mörk í úrslitaleiknum.
- Ísak Steinsson markvörður 20 ára landsliðs Íslands stóð í marki Drammen í gær þegar liðið vann, Ros, fyrrverandi lið Ísaks, 47:24, í norsku bikarkeppninni en leikið var í Ros Arena. Eins og fram kom m.a. á handbolti.is í sumar samdi Ísak við Drammen til þriggja ára.
- Hinn hálf íslenski Viktor Petersen Norberg skoraði fimm af mörkum Drammen í leiknum.
- Einar Bragi Aðalsteinsson skoraði fjögur mörk þegar lið hans IFK Kristianstad vann IFK Karlskrona, 33:22, í annarri umferð í fjórða riðli sænsku bikarkeppninnar. Kristianstad hefur þar með unnið tvo fyrstu leiki sína í riðlinum. IFK Karlskrona er ekki liðið sem Íslendingarnir þrír, Dagur Sverrir Kristjánsson, Ólafur Andrés Guðmundsson og Þorgils Jón Svölu Baldursson leika með. Nafn þess er HK Karlskrona.
- Tryggvi Þórisson og samherjar í sænska meistaraliðinu IK Sävehof lögðu Lindesberg, 39:26, í fyrstu umferð 1. riðils sænsku bikarkeppninnar á útivelli í gær. Tryggvi skoraði ekki mark í leiknum.
- Bjarki Már Elísson skoraði eitt mark og lék aðeins fyrri hálfleikinn með Veszprém vann THW Kiel á æfingamóti í Ungverjalandi í gær, 38:34. Daginn áður vann Vezprém liðsmenn Füchse Berlin. Magakveisa herjaði á leikmenn Veszprém í gær og gat Xavi Pascual þjálfari aðeins teflt fram 13 leikmönnum í upphafi leiks og 12 í síðari hálfleik eftir að Bjarki Már heltist úr lestinni vegna kveisunnar.
- Arnar Freyr Arnarsson og Elvar Örn Jónsson voru ekki með MT Melsungen á æfingamóti um helgina vegna meiðsla. Þeir hafa verið meiddir um tíma.
- Viktor Gísli Hallgrímsson markvörður var ekki í leikmannahópi pólska meistaraliðsins Wisla Plock í eins marks sigri á þýska liðinu Leipzig, 24:23, í æfingaleik á laugardaginn.
- Íslendingarnir hjá Leizpig tóku þátt í leiknum. Viggó Kristjánsson skoraði sex mörk og Andri Már Rúnarsson tvö. Rúnar Sigtryggsson þjálfari liðsins var að vanda við stjórnvölin. Honum var nokkur vandi á höndum áður en leikurinn hófst vegna þess að báðir línumenn liðsins voru meiddir og gátu ekki tekið þátt.
- Auglýsing -
