- Auglýsing -
- Æsipenna var í annarri viðureign Kolstad og Elverum í úrslitum úrslitakeppni norsku úrvalsdeildarinnar í karlaflokki í gær. Elverum vann, 41:40, eftir tvær framlengingar á heimavelli. Staðan er þar með jöfn, hvort lið hefur einn vinning. Leikið verður til þrautar á miðvikudagskvöld á heimavelli Kolstad í Þrándheimi.
- Sigvaldi Björn Guðjónsson fyrirliði Kolstad var markahæstur í leiknum með níu mörk. Tobias Grøndahl skoraði 11 mörk fyrir Elverum, þar á meðal sigurmarkið.
- Einvígi GC Amicitia Zürich og LC Brühl Handball um meistaratitilinn í handknattleik kvenna verður leitt til lykta í oddaleik í St. Gallen á föstudaginn. Leikir liðanna hafa verið hnífjafnir og æsilega spennandi til þessa. M.a. varð að framlengja eina viðureignina. Leikur liðanna í Zürich í gær var engin undantekning. LC Brühl Handball vann, 26:25. Sigurmarkið var skorað á síðustu sekúndu. Akureyringurinn Harpa Rut Jónsdóttir skoraði ekki mark fyrir GC Amicitia Zürich í leiknum á heimavelli í gær.
- Tumi Steinn Rúnarsson lék prýðisvel fyrir HSC 2000 Coburg þegar liðið vann SG BBM Bietigheim, 33:32, á heimavelli í næst síðustu umferð 2. deildar þýska handknattleiksins í gær. Hann skoraði fimm mörk og átti eina stoðsendingu í síðasta heimaleiknum fyrir HSC 2000 Coburg en Tumi Steinn flytur til Austurríkis í sumar og gengur til liðs við Alpla Hard sem leikur á næstunni um meistaratitilinn þar í landi. Coburg er í 5. sæti með 39 stig eins og Elbflorenz og Eintracht Hagen. SG BBM Bietigheim er í öðru sæti og fer upp úr deildinni ásamt Potsdam.
- EHV Aue, undir stjórn Ólafs Stefánssonar, gerði jafntefli við Eintracht Hagen á heimavelli í síðasta heimaleiknum á tímabilinu í 2. deild þýska handknattleiksins, 34:34. Stigið dugði skammt fyrir Aue sem fellur úr deildinni. Sveinbjörn Pétursson stóð í marki Aue hluta leiksins og varði 3 skot, 18,7%.
- Hákon Daði Styrmisson lék ekki með Eintracht Hagen vegna meiðsla. Eins og kom fram á handbolti.is á dögunum meiddist Hákon Daði á hné í kappleik liðsins. Í ljós kom að um slitið krossband var að ræða og gekkst Hákon Daði undir aðgerð á föstudaginn, eftir því sem hann segir frá á Facebook.
- Auglýsing -
