- Auglýsing -
- Dómarar og eftirlitsmenn verða á ferð og flugi næstu daga og það fleiri en sagt var frá í gærmorgun. Svavar Ólafur Pétursson og Sigurður Hjörtur Þrastarson dæma leik Riihimäen Cocks og BSV Bern í Evrópubikarkeppni karla í handknattleik í Finnlandi á morgun, laugardag.
- Daginn eftir verður Reynir Stefánsson eftirlitsmaður á leik Runar Sandefjord og Sakarya BSB SK frá Tyrklandi í Evrópubikarkeppni karla. Leikurinn fer fram í Noregi.
- Þar með er ekki öll sagan sögð vegna þess að Ólafur Örn Haraldsson verður eftirlitsmaður á viðureign Bjerringbro/Silkeborg og BM Logrono La Rioja í 1. umferð riðlakeppni Evrópudeildar karla í handknattleik á Jótlandi á þriðjudagskvöld.
- Tryggvi Þórisson var í leikmannahópi Sävehof á nýjan leik í gær þegar liðið vann Amo, 35:29, eftir að hafa verið marki undir að loknum fyrri hálfleik, 18:17. Tryggvi kom ekki mikið við sögu í leiknum en hann hefur verið fjarverandi upp á síðkastið.
- Arnar Birkir Hálfdánsson skoraði fjögur mörk í 11 skotum og hefur oft leikið betur fyrir Amo en að þessu sinni. Þetta var annar tapleikur Amo í röð en liðið vann fjóra fyrstu leiki sína í deildinni og situr nú í öðru sæti með átta stig að loknum sex leikjum. Sävehof er efst með 10 stig en hefur lokið sjö leikjum.
- Auglýsing -