Talnaglöggir fullyrða að aldrei hafi fleiri Íslendingar horft á landsleik íslenska landsliðsins í handknattleik á erlendri grund en í gærkvöld þegar landsliðið mætti Serbum í upphafsleik liðanna í Ólympíuhöllinni í München. Talið er víst að Íslendingar hafi verið á milli 3.500 og 4.000, allt að eitt þúsund fleiri en þegar Ísland og Svíþjóð mættust í Gautaborg á heimsmeistaramóti karla í handknattleik fyrir ári.
Ekki aðeins voru Íslendingarnir fleiri en nokkru sinni fyrr á áhorfendapöllunum heldur voru þeir hreint stórkostlegir. Þeir mættu snemma á pallana og settu frábæran svip á upphitun fyrir leikinn auk þess að taka þátt í leiknum sjálfum á hreint magnaðan hátt svo eftir var tekið. Studdu þeir á einstakan hátt við bakið á landsliðinu í erfiðum leik undir stjórn Sérsveitarinnar, stuðningsmannafélags íslensku handboltalandsliðanna.
Uppselt var í Ólympíuhöllina. Alls voru áhorfendur 12.128.
Ljósmyndarinn Hafliði Breiðfjörð hafi ekki aðeins augun á leiknum heldur beindi hann einnig sjónum sínum að íslensku áhorfendunum. Hér fyrir neðan er myndasyrpa af hluta af íslenska stuðningsmannahópnum. Smellið á myndirnar til þess að sjá þær stærri.
Fleiri syrpur Hafliða frá EM:
Myndir Hafliða: Ísland – Serbía, 27:27
Myndir: Íslendingar troðfylltu Hofbräuhaus
