Þórir Ólafsson þjálfari karlaliðs Selfoss segir leikmenn sína koma vel undirbúna til leiks í kvöld eftir sex vikna hlé þegar keppni hefst á Olísdeildinni. Selfoss sækir Val heim í N1-höllina á Hlíðarenda klukkan 19.30 þegar 14. umferð hefst með fjórum leikjum. Selfoss er í neðsta sæti Olídeildar með sex stig eins og Víkingur. Valur situr í öðru sæti, þremur stigum á eftir efsta liðinu, FH.
Selfoss fékk tvo leikmenn til liðs við sig í upphafi ársins, örvhentu skyttuna Ásgeir Snæ Vignisson frá Fjellhammer í Noregi og Friðrik Hólm Jónsson, vinstri hornamann, að láni frá ÍBV.
Þórir var í stuttu viðtali við samfélagsmiðla Selfoss, sem er að finna neðst í þessari frétt, segir að Ásgeir Snær hafi æft með liðinu í tvær vikur og á þeim tíma kynnst nýjum samherjum.
Friðrik Hólm hefur einnig fallið vel inn í hópinn. Hann glímir við lítilsháttar meiðsli og verður tæplega með í kvöld. Eins er varnarjaxlinn Sverrir Pálsson frá keppni vegna meiðsla.
Sex vikna hlé hefur nýst Selfossliðinu vel að sögn Þóris sem horfir bjartsýnn fram á veginn en níu umferðir eru eftir af Olísdeildinni áður en kemur að úrslitakeppni.
Staðan og næstu leikir í Olísdeildum.
