Óðinn Þór Ríkharðsson lét að sér kveða kvöld þegar svissneska meistaraliði Kadetten Schaffhausen sótti tvö stig til Svartfjallalands í heimsókn til HC Lovcen-Cetinje. Óðinn Þór skoraði sex mörk í leiknum sem Kadetten vann með þriggja marka mun, 29:26.
Kadetten er þar með komið með fjögur stig í E-riðli, tveimur stigum á eftir Flensburg sem lagði Elverum naumlega í Elverum í kvöld og sagt er frá hér.
Fjögur mörk frá Stiven Tobar Valencia dugðu Benfica ekki til sigurs á heimavelli í kvöld þegar liðsmenn Rhein-Neckar Löwen komu í heimsókn. Um hörkuleik var að ræða sem Löwen vann, 36:35. Hefur liðið þar með sex stig eftir þrjá leiki og situr í efsta sæti A-riðils.
Samherjarnir hjá Val á síðasta tímabili, Stiven Tobar og Arnór Snær Óskarsson, voru andstæðingar í kvöld. Arnór náði ekki að skora í leiknum fyrir Löwen ekkert fremur en Ýmir Örn Gíslason. Daninn Niclas Kirkeløkke fór á kostum og skoraði 14 mörk fyrir Löwen. Þar á meðal sigurmarkið þegar ein sekúnda var eftir eins og sjá má á meðfylgjandi myndskeiði.
Second half of SL Benfica – Rhein-Neckar Löwen is one of the craziest half I’ve ever seen. And the last 30 seconds unbelievable. Do yourself a favor and watch it.
— Rasmus Boysen (@RasmusBoysen92) November 14, 2023
Kirkeløkke decides the match in the last second with his 14th goal of the match. Handball, handball, handball.… pic.twitter.com/CxOeo7AY7W
Rhein-Neckar Löwen gerði vel með að vinna í Lissabon því nokkrir leikmenn eru fjarverandi vegna meiðsla og veikinda, þar á meðal Patrick Groetzki og Jannik Kohlbacher.
Tryggvi og félagar efstir
Tryggvi Þórisson og félagar í Sävehof halda áfram að gera það gott í Evrópudeildinni. Þeir unnu stórsigur á Pfadi Winterthur, 41:20, í Partille í Svíþjóð í kvöld. Tryggvi skoraði ekki mark í leiknum enda er hans sérgrein varnarleikur. Sävehof er efst með sex í C-riðli.
