Ólafur Andrés Guðmundsson leikur með HF Karlskrona í sænsku úrvalsdeildinni í handknattleik á næsta keppnistímabili. Það varð ljóst í kvöld þegar HF Karlskrona vann OV Helsingborg, 26:21, í oddaleik liðanna í umspili um sæti í úrvalsdeildinni á næstu leiktíð.
Karlskrona hafnaði í öðru sæti næst efstu deildar á dögunum meðan Helsingborg var á meðal neðstu liða úrvalsdeildarinnar. Helsingborg kom upp í úrvalsdeildina fyrir ári.
Ólafur Andrés samdi fyrir nokkrum vikum við HF Karlskrona. Gilti einu hvort liðið yrði áfram í næstu efstu deild eða færðist upp í úrvalsdeild. Ólafur Andrés leikur þar með í sænsku úrvalsdeildinni á nýjan leik í haust eftir tveggja ára veru í Frakklandi og í Sviss.
Ásgeir Snær Vignisson skoraði ekki mark fyrir OV Helsingborg í kvöld. Hann átti eitt markskot sem geigaði. Ásgeir Snær gekk til liðs við félagið fyrir ári. Hann hefur verið orðaður við norska úrvalsdeildarliðið Fjellhammer, eins og handbolti.is sagði frá fyrir nokkru.
