Ólafur Andrés Guðmundsson landsliðsmaður í handknattleik hefur skrifað undir þriggja ára samning við sænska handknattleiksliðið HF Karlskrona. Félagið staðfesti fréttirnar í morgun en Aftonbladet í Svíþjóð sagði fyrst frá þessu í síðustu viku.
Karlskrona er í öðru sæti næst efstu deildar þegar tveir leikir eru eftir, einu stigi og einum leik á eftir Amo HK. Eitt lið fer beint upp í úrvalsdeildina. Liðin sem hafna í öðru, þriðja og fjórða sæti taka þátt í umspili um sæti í efstu deild.
Ólafur Andrés leikur nú með GC Amicita Zürich í Sviss. Hann þekkir vel til í Svíþjóð enda leikið þar lengst af á ferli sínum, fyrst frá 2012 til 2014 og aftur frá 2015 til 2021 og var afar sigursæll með liðinu og vel metinn. Karlskrona er austan við Kristianstad á suður austurhluta Svíþjóðar.
Ólafur Andrés, sem er 32 ára gamall, meiddist þegar hann var með íslenska landsliðinu á HM í janúar og hefur ekkert leikið með Zürich-liðinu frá þeim tíma. Ólafur á að baki 142 landsleiki sem hann hefur skorað í 269 mörk.
Med stolthet kan vi presentera den isländska landslagsmannen Olafur Gudmundsson! Kontraktet är skrivet till 2026. Olafur ansluter till truppen i sommar https://t.co/GYFPpCPgPB pic.twitter.com/e6hGc2FJVZ
— HF Karlskrona (@HFKarlskrona) March 14, 2023
