Þau gleðitíðindi berast frá Þýskalandi að Ómar Ingi Magnússon er mættur út á handboltavöllinn með liði sínu SC Magdeburg í fyrsta sinn á þessu ári. Selfyssingurinn er í leikmannahópi Evrópumeistaranna sem leika nú við Wetzlar á heimavelli Wetzlar í 1. umferð þýsku 1. deildarinnar í handknattleik. Er það fyrr en reiknað var með.
Ekki lengi að skora
Þegar þetta er skrifað er viðureignin nýlega hafin og markakóngur þýsku 1. deildarinnar 2021 hefur þegar skorað mark og átt annað markskot sem geigaði.
Ómar Ingi hefur verið frá keppni eftir að hann gekkst undir aðgerð á hæl strax eftir heimsmeistaramótið í Svíþjóð í janúar. Eftir það tók við þrotlaus endurhæfing sem hefur skilað mjög góðum árangri.
Annað kom á daginn
Snemma í þessum mánuði sagðist Bennet Weigert þjálfari SC Magdeburg ekki reikna með Ómari Inga í allra fyrstu leikjum tímabilsins. Annað hefur komið á daginn og Ómar Ingi er farinn að gera usla í vörnum andstæðinganna í Þýskalandi þeim væntanlega til skelfingar en okkur sem kunnum að meta töfrabrögð Selfyssingsins til ómældrar ánægju.
Tengdar fréttir:
Okkar fólk úti.
