Ömurlegt að ná ekki þessum titli

„Við hættum að fá stoppin í vörninni sem við fengum í fyrri hálfleik. Lentum í ströggli í vörninni. Síðan voru nokkrar sóknir um miðbik síðari hálfleiks þegar hökt var á okkur. Þar með hleyptum við Aftureldingu inn í leikinn í stað þess að halda tveggja til þriggja marka forskoti,“ sagði Ásgeir Örn Hallgrímsson þjálfari Hauka og var fremur þurr á manninn þegar handbolti.is hitti hann eftir tap liðsins fyrir Aftureldingu í úrslitum Poweradebikarsins í handknattleik karla í kvöld, 28:27, í Laugardalshöll í leik þar sem Haukar voru lengst af með tögl og hagldir.

„Við ætluðum okkur þennan titil og náðum því ekki og það er ömurlegt,“ sagði Ásgeir Örn ennfremur.