Sigurður Bragason þjálfari kvennaliðs ÍBV var í dag úrskurðaður í tveggja leikja bann, fyrir að hafa brotið gegn leikreglu 8:10 a) og VI. kafla reglugerðar um agamál, með því að hafa sýnt af sér afar óíþróttamannslega framkomu gagnvart starfsmönnum og leikmönnum Vals og viðhaft orðin „fokkaðu þér“ gagnvart leikmanni Vals, segir í úrskurði aganefndar HSÍ sem er afar ýtarlegur að þessu sinni og var birtur á vef HSÍ í kvöld.
Sigurður verður þar með í leikbanni og má ekki stjórna liði ÍBV gegn Haukum á Ásvöllum á föstudaginn í Olísdeild kvenna og í undanúrslitum Poweradebikarsins á miðvikudaginn eftir rúma viku.
Mál Sigurðar er rakið hér á yfirgripsmikinn hátt.
Atli Ævar í leikbann
Atli Ævar Ingólfsson línumaður Selfoss var einnig úrskurðaður í eins leiks bann á fundi aganefndar í dag vegna mjög grófrar ódrengilegrar hegðunar í leik Selfoss og ÍR á föstudaginn síðasta. Atli Ævar verður þar af leiðandi fjarri góðu gamni í næsta leik Selfoss sem verður við Val annan föstudag.
Arnar Huginn Ingason leikmaður Víkings U hlaut útilokun með skýrslu vegna mjög grófrar ódrengilegrar hegðunar í leik Víkings U og Fjölnis U í 2. deild karla þann 28.02.2023. Hann verður í banni í næsta leik Víkings U.
Önnur mál sem komu inn á borð aganefndar til úrskurðar voru afgreidd með hefðbundinni áminningu um stighækkandi áhrifum útilokana vegna slíkra brota, skv. 2. mgr. 11. sömu reglugerðar.
