„Ég vil sjá fullt hús á leikinn við PAUC á þriðjudaginn, eins og var á leiknum við Flensburg fyrir áramótin. Við þurfum á því að halda enda komnir í frábæra stöðu í keppninni og tryggjum okkur sæti í 16-liða úrslitum með sigri. Það væru vonbrigði ef ekki verður fljótlega uppselt á leikinn,“ sagði Snorri Steinn Guðjónsson þjálfari karlaliðs Vals í handknattleik sem skorar á handknattleiksunnendur að mæta á viðureign Vals og franska liðsins PAUC í næst síðustu umferð riðlakeppni Evrópudeildarinnar Origohöllinni á þriðjudagskvöldið.
Með sigri í leiknum tryggir Valur sér þriðja sæti B-riðils Evrópudeildarinnar og þátttökurétt í 16-liða úrslitum Evrópudeildarinnar sem fram fara síðla í mars.
Með franska liðinu leikur m.a. landsliðsmaðurinn Kristján Örn Kristjánsson, Donni.
„Við þurfum svo mikið á þessum stuðningi að halda, ekki bara við Valsmenn heldur íslenskur handbolti eins og hann leggur sig og framtíðar Íslandsmeistarar. Þetta hefur svo gríðarlega þýðingu fyrir alla,“ sagði Snorri Steinn Guðjónsson þjálfari Vals í samtali við handbolta.is eftir sigur Vals á Benidorm á þriðjudagskvöldið.
Hægt er að kaupa miða á leik Vals og PAUC á þriðjudaginn hjá Tix.is með því einu að smella hér.
