Valur tryggði sér deildarmeistaratitilinn í handknattleik kvenna í dag með sigri á Stjörnunni, 31:27, í Mýrinni í Garðabæ í lokaleik 19. umferðar. Eftir sigurinn í dag hefur Valur 36 stig. Ekkert lið getur jafnað Val að stigum héðan af og ennþá síður náð fleiri stigum fari svo að Valsliðið tapi tveimur síðustu viðureignum sínum.
Valur hefur þar með orðið deildarmeistari í handknattleik kvenna í sjö skipti, síðast árið 2019.
Fram og Haukar hafa 28 stig hvort lið. Haukar eiga þrjá leiki eftir óleikna en Fram tvo.
Staðan var jöfn að loknum fyrri hálfleik í Mýrinni í dag, 17:17. Þrátt fyrir ákafar tilraunir Stjörnunnar í síðari hálfleik þá tókst liðinu ekki að leggja stein í götu Valsliðsins sem náði fljótlega tveggja til þriggja marka forskoti sem það hélt leikinn út.
Stjarnan situr í sjötta sæti Olísdeildar með níu stig, aðeins einu stigi fyrir ofan Aftureldingu. Sjötta sætið gefur þátttökurétt í 1. umferð úrslitakeppninnar gegn liðinu sem hafnar í þriðja sætið þegar dæmið verður gert upp að lokinni síðustu umferðinni laugardaginn 23. mars.
Staðan og næstu leikir í Olísdeildum.
Mörk Stjörnunnar: Eva Björk Davíðsdóttir 11/3, Anna Karen Hansdóttir 5, Helena Rut Örvarsdóttir 4, Anna Lára Davíðsdóttir 3, Vigdís Arna Hjartardóttir 2, Embla Steindórsdóttir 2.
Varin skot: Darija Zecevic 16, 34%.
Mörk Vals: Thea Imani Sturludóttir 9, Elín Rósa Magnúsdóttir 6, Morgan Marie Þorkelsdóttir 4, Lilja Ágústsdóttir 4, Þórey Anna Ásgeirsdóttir 3, Hildigunnur Einarsdóttir 2, Auður Ester Gestsdóttir 1, Hildur Björnsdóttir 1, Ásdís Þóra Ágústsdóttir 1.
Varin skot: Sara Sif Helgadóttir 15/2, 35,7%.
Tölfræði leiksins hjá HBStatz.
