„Ég er hrikalega stoltur af liðinu sem hefur unnið fjóra leiki í röð sem er stórt fyrir okkur. Við erum á góðri siglingu,“ sagði sigurreifur þjálfari Stjörnunnar, Hrannar Guðmundsson, í samtali við handbolta.is í kvöld eftir að Stjarnan vann KA, 26:23, í afar spennandi leik í átta liða úrslitum Poweradebikars karla í handknattleik. Leikið var í Mýrinni í Garðabæ.
Merki um framfarir
„Síðustu tveir leikir okkar við KA hafa ekki verið okkar bestu leikir en við höfum klárað þá. Það er merki um framfarir að mínu mati. Fyrir áramót hefðum við sennilega tapað þessum leik niður í framlengingu. Við erum að verða sterkari og byrjaðir að vinna spennuleikina,“ sagði Hrannar sem stýrði Stjörnunni til fjórða sigurleiksins í röð þegar litið er til Olísdeildarinnar og Poweradebikarsins.
Liðsheildin er geggjuð
Hrannar tók við Stjörnunni þegar hún skrapaði nánast botninn eftir erfiða byrjun í Olísdeildinni í haust. Liðið hefur mjakast jafnt og þétt upp töfluna í Olísdeildinni og er nú í sjöunda sæti auk þess að vera í undanúrslitum Poweradebikarsins.
„Ég dýrka þessa gæja,“ sagði Hrannar um leikmenn sína. „Þetta er svo miklir meistarar, liðsheildin er geggjuð,“ sagði Hrannar sem var hátt uppi eftir sigurinn þegar útsendari handbolta.is rak á fjörur hans rétt eftir að flautað var til leiksloka í háspennuleik í Mýrinni.
