„Það sem meðal annars heldur mér gangandi í starfinu er að vinna með leikmenn milli móta, byggja upp nýtt lið og takast á við þær breytingar sem sífellt eiga sér stað því sjaldnast erum við með sama leikmannahóp stórmót eftir stórmót þótt kjarninn sé sá sami,“ sagði Þórir Hergeirsson þjálfari nýkrýndra Evrópumeistara Noregs í handknattleik kvenna og sigursælasti landsliðsþjálfari sögunnar spurður hvað haldi honum á tánum mót eftir mót, ár eftir ár. Handbolti.is tala við Þóri á dögunum.
„Stundum þarf að breyta vörninni þegar tveir, þrír eða fjórir leikmenn detta út nokkrum vikum eða mánuðum fyrir mót eins og til dæmis gerðist fyrir EM að þessu sinni,“ sagði Þórir ennfremur og bætti við.
Gaman að taka þátt í þróun
„Ég fæ mikið út úr vinnu við að skipuleggja, setja okkur markmið, finna út hvað þarf að gera og fylgja því eftir. Þetta er mín helsta hvatning. Það er gaman að fást við að þróa leikmenn sem leikmenn og manneskjur. Taka þátt í þroskaferli leikmanna.
Til viðbótar hef ég auðvitað gaman af því að etja kappi við önnur lið og aðra þjálfara. Ég er þannig að ég vil alltaf vinna, sama hvað ég tek mér fyrir hendur. Hópurinn sem ég er með er á sömu línu,“ sagði Þórir léttur í bragði í samtali við handbolta.is í vikunni.
