„ÍR er vel manna lið og hefur leikið vel stóran hluta tímabilsins þótt okkur hafi tekist að vinna ÍR-inga á sannfærandi hátt í leikjum þegar vantaði nokkra leikmenn í þeirra lið. Í ljósi þess þá bjuggum við okkur mjög vel undir erfiðan leik sem raun varð á,“ sagði Ágúst Þór Jóhannsson þjálfari Vals eftir átta marka sigur á ÍR, 29:21, í undanúrslitum Powerade-bikarsins í handknattleik kvenna í Laugardalshöll í kvöld.
„Við vorum lengi vel í basli með að hrista ÍR-inga af okkur en voru komin í góða stöðu í hálfleik, 17:10, og hefðum hæglega getað verið með meira forskot. Eftir fyrri hálfleik vorum komin í lykilstöðu. Fyrstu 10 mínúturnar snerust um að halda sjó, róa leikinn aðeins niður, og ná þannig að sigla sigrinum í land,“ sagði Ágúst Þór sem varð ánægður með að ná að „rúlla“ á öllum hópnum til að leikmenn verði ekki úrvinda þegar á hólminn verður komið á laugardaginn gegn annað hvort Stjörnunni eða Selfossi í úrslitaleiknum.
„Við verðum að sjálfsögðu klárar í slaginn á laugardaginn. Tökum létta æfingu á morgun og fundum saman. Það spennandi laugardagur framundan þar sem bæði lið Vals leika til úrslita í bikarnum. Við verðum að einbeita okkur eins vel að þeim atriðum sem að okkur snúa, jafnt leikmenn sem þjálfarateymið,“ sagði Ágúst Þór Jóhannsson við handbolta.is í Laugardalshöll.
Tengt efni:
Valur í úrslit í þriðja sinn í röð
Stolt af stelpunum og fólkinu okkar
