„Ég er viss um að það er mjög gott fyrir okkur á þessum tímapunkti að fá leik við landslið eins og Lúxemborg þegar við þurfum að huga vel að okkar leik og þróun hans. Við verðum að mæta 100% klárar í verkefnið þótt við vitum ekki mikið um andstæðinginn en erum þó taldar vera fyrirfram sterkari,“ sagði Sunna Jónsdóttir landsliðskona og leikmaður ÍBV þegar handbolti.is hitti hana að máli í aðdraganda upphafsleiks Íslands í 7. riðli undankeppni EM í handknattleik sem fram fer annað kvöld á Ásvöllum þegar landslið Lúxemborgar kemur í heimsókn.
„Leikurinn við Lúxemborg og síðan gegn Færeyingum um helgina skipta miklu máli bæði varðandi undankeppnina og það markmið okkar að komast í lokakeppni EM. Færeyingar eru með mjög vaxandi landslið sem verður einnig krefjandi verkefni fyrir okkur á sunnudaginn ytra,“ sagði Sunna og bætti við. „Tökum einn leik í einu.“
Spennandi tímar
„Það eru bara virkilega spennandi tímar framundan með mörgum yngri frábærum leikmönnum í liðinu og mörgum stórum verkefnum. Svo erum við nokkrar eldri eftir sem reyna að leiða hópinn áfram,“ sagði Sunna ennfremur með bros á vör og sagði ekki vera hægt að leyna því að mikil eftirvænting væri í hópnum fyrir komandi verkefnum á næstu mánuðum þar sem HM ber hæst. „Maður reynir eftir megni að halda sig í núinu.“
Tveir leikir
Landsliðið verður saman í rúma viku að þessu sinni þar sem leikirnir við Lúxemborg og Færeyjar standa hæst. Landsliðið kemur síðan ekki aftur saman fyrr en eftir miðjan nóvember þegar undirbúningur fyrir þátttöku á heimsmeistaramótinu hefst.
EM er stóra markmiðið
„Þessir dagar sem við erum saman núna skipta gríðarlega miklu máli. Stóra verkefnið sem við höfum horft lengi til er að tryggja okkur þátttökurétt á EM 2024. HM, sem stendur fyrir dyrum í lok nóvember og í desember, er gulrót á leiðinni á EM. Þessi vika er ótrúlega mikilvæg fyrir okkur til þess að komast á EM. Af þeim sökum verðum við að gera eitthvað gott á handboltavellinum næstu daga,“ sagði Sunna Jónsdóttir í samtali við handbolta.is.
Viðureign Íslands og Lúxemborgar hefst klukkan 19.30 á Ásvöllum á miðvikudaginn. Frítt verður á leikinn í boði Boozt.com, eins af samstarfsfyrirtækjum HSÍ. Eftir því sem næst verður komist hafa landsliðs Íslands og Lúxemborgar ekki áður mæst í landsleik í kvennaflokki.
Tengdar fréttir:
Lena Margrét hleypur í skarðið fyrir Birnu Berg
Hópur valinn fyrir fyrstu leikina í undankeppni EM
Koma til Íslands sex árum eftir endurreisn – í fyrsta sinn í undankeppni EM