Landsliðskonan Elín Klara Þorkelsdóttir úr Haukum skoraði eitt af flottustu mörkum Evrópumóts kvenna í handknattleik sem lauk um síðustu helgi. Eitt marka hennar í leik Íslands við Holland í fyrstu umferð riðlakeppninnar í Ólympíuhöllinni í Innsbruck er eitt tíu bestu marka mótsins, nánar tiltekið í 5. sæti, í samantekt sem Handknattleikssamband Evrópu, EHF, hefur tekið saman og sjá má hér fyrir neðan.
Elín Klara skoraði alls 11 mörk á Evópumótinu í þremur leikjum íslenska landsliðsins og var næst markahæsti leikmaður liðsins.
Árið hefur verið viðburðaríkt hjá Elínu Klöru á handboltavellinum, bæði með Haukum og íslensku landsliðunum. Hún var í sumar valin í úrvalslið HM 20 ára landsliða sem fram fór í Skopje hvar íslenska liðið hafnaði í 7. sæti eftir að hafa verið nærri sæti í undanúrslitum.
Eldri bróðir Elínar Klöru, Orri Freyr Þorkelsson, verður í eldlínunni með íslenska landsliðinu á HM sem hefst um miðjan janúar meðan Elín Klara stendur í ströngu með Haukum í Olísdeildinni og í Evrópubikarkeppninni.
