Alfreð Gíslason hefur skrifað undir nýjan samning við þýska handknattleikssambandið um að þjálfa karlalandsliðið fram yfir heimsmeistaramótið sem fram fer í Þýskalandi í ársbyrjun 2027. Einn varnagli er þó sleginn og hann er sá að ef þýska landsliðinu tekst ekki að tryggja sér sæti í handknattleikskeppni Ólympíuleikanna þá tekur nýr samningur ekki gildi.
Nýr samningur á milli Alfreðs og þýska handknattleikssambandsins hefur legið í loftinu undanfarnar vikur en fyrri samningur átti að renna út í sumar.
Alfreð var ráðinn landsliðsþjálfari Þýskalands í mars 2020 og er nú að framlengja samning sinn í annað sinn.
Framundan hjá þýska liðinu er þátttaka í forkeppni Ólympíuleikanna sem fram fer í Hannover 14. til 17. mars. Alfreð valdi fyrir helgina leikmannahóp sem tekur þátt í forkeppninni og kemur saman til æfinga á sunnudaginn.
Gaugisch heldur einnig áfram
Um leið og tilkynnt var um framhald þýska handknattleikssambandsins við Alfreð var einnig greint frá endurnýjuðum samningi við Markus Gaugisch þjálfara kvennalandsliðs Þýskalands fram til 30. júní 2026. HM kvenna fer fram í Þýskalandi og Hollandi í desember 2025.
Gaugisch tók við þjálfun kvennalandsliðsins 2022 eftir að hafa gert það gott með meistaraliðið Bietigheim. Gaugisch þykir hafa náð góðum árangri með landsliðið og tekist að koma því inn á rétta sporið. M.a. náði þýska landsliðið sínum besta árangri í 16 ár á HM í desember sl.
Þjóðverjar eiga sæti næsta víst í lokakeppni Evrópumóts kvenna í lok ársins auk þess sem í næst mánuði stendur fyrir dyrum þátttaka í forkeppni Ólympíuleikanna 11. – 14. apríl.
