Landslið Íslands tapaði fyrir Portúgal, 22:28, á Evrópumóti 17 ára landsliða kvenna í handknattleik í Verde Complex íþróttahöllinni í Podgorica í Svartfjallalandi í dag.
Portúgal leikur því um 13. sæti mótsins á morgun en Ísland leikur um 15. sætið við Norður Makedóníu sem tapaði fyrir Sviss í dag. Viðureign Íslands og Norður Makedóníu hefst klukkan 9.15, í fyrramálið að íslenskum tíma.
Íslensku stelpurnar byrjuðu leikinn mjög vel og héldu forystu fyrstu 20 mínúturnar af fyrri hálfleik. Þá náðu þær portúgölsku yfirhöndinni um tíma en íslensku stelpurnar náðu að jafna leikinn í lok hálfleiksins, með góðri baráttu og mikilvægri markvörslu. Staðan í hálfleik var 14:14.
Í seinni hálfleik héldu íslensku stelpurnar í við þær portúgölsku fyrstu 15 mínúturnar, voru þá einu marki undir 18:19. Eftir það varð róðurinn smám saman þyngri og þyngri hjá okkar stelpum og þær portúgölsku náðu jafnt og þétt að auka forskot sitt. Leiknum lauk með sex marka mun, 22:28 fyrir Portúgal.
Mörk Íslands: Dagmar Guðrún Pálsdóttir 6, Lydía Gunnþórsdóttir 5, Ásthildur Jóna Þórhallsdóttir 4, Arna Karitas Eiríksdóttir 2, Guðmunda Auður Guðjónsdóttir 2, Alexandra Ósk Viktorsdóttir 2, Ester Amíra Ægisdóttir 1.
Varin skot: Ingunn María Brynjarsdóttir 9, 26,5 %, Sif Hallgrímsdóttir 1, 25 %.
EMU17: Milliriðlar, leikir, úrslit, staðan
Handbolti.is fylgdist með leiknum í textalýsingu hér fyrir neðan.
