Færeyski handknattleikskarlinn Elias Ellefsen á Skipagøtu og franska handknattleikskonan Léna Grandveau eru efnilegasta handknattleiksfólk heims um þessar mundir. Sú er alltént niðurstaðan í kjöri Alþjóða handknattleikssambandsins í vali á efnilegasta handknattleiksmönnum ársins 2023.
Leiðtogi færeyska landsliðsins
Elias, sem gekk til liðs við þýsku meistarana THW Kiel á síðasta sumri, hefur farið fyrir færeyska karlalandsliðinu sem hefur náð frábærum árangri á síðustu árum í stórsókn sinni á handknattleiksvöllum Evrópu. Hann er leiðtogi landsliðsins sem braut blað í íþróttasögu Færeyja þegar liðið tryggði sér þátttökurétt á Evrópumótinu sem fram fór í Þýskalandi í janúar.
Færeyingar eru fámennsta þjóð sem hefur unnið sér sæti í lokakeppni stórmóts í handknattleik.
Allt í öllu á HM 21 árs liða
Elias hefur einnig leitt yngri landslið Færeyja á síðustu árum til afreka á stórmótum yngri landsliða. Hann var markahæsti leikmaður heimsmeistaramóts 21 árs landsliða á síðasta sumri með 55 mörk auk þess að gefa 48 stoðsendinga. Fyrir vikið var hann verðskuldað valinn í úrvalslið heimsmeistaramótsins. Færeyska landsliðið hafnaði í sjöunda sæti en var afar nærri sæti í undanúrslitum.
Franskt ungstirni slær í gegn
Grandveau, sem varð 21 árs gömul 21. janúar leikur með Nantes í heimalandi sínu en engu að síður undir smásjá stærstu félagsliða Evrópu. Hún tók þátt EM A-landsliða 2022 og var í stóru hlutverki í franska landsliðinu þegar það varð heimsmeistari í desember eftir sigur á norska landsliðinu í úrslitaleik. Grandveau skoraði m.a. fimm mörk í úrslitaleiknum.
