„Hvar er Lalli?“ spurðu umsjónarmenn Handkastsins hvern annan í nýjasta þættinum sem fór í loftið í gær og áttu þar við markvörðinn Lárus Helga Ólafsson sem virðist hafa hafnað á milli stafs og hurðar innan Framliðsins.
Samkvæmt heimildum Handkastsins reyndi Fram að segja upp samningi sínum við Lárus Helga í vor eða sumar en tókst svo illa til að uppsögnin féll um sjálfa sig.
Lárus Helgi var ekki með Fram gegn KA á fimmtudagskvöldið í KA-heimilinu og kom lítið sem ekkert við sögu í fyrsta leiknum. „Samkvæmt okkar heimildum var hann heima í gærkvöldi,” sagði Styrmir Sigurðsson einn umsjónarmanna Handkastsins.
„Nennti Lalli ekki með norður, vildu þeir ekki hafa hann með eða ætlar Einar ekki að nota hann?“ velti Styrmir upp í þættinum en mjög líflegar umræður kviknuðu í þættinum um framtíð Lárusar Helga innan Fram.
Umræðan um Lárus Helga og Fram hefst eftir 20,2 mínútur í þættinum sem nálgast má hér fyrir neðan.
