Hrvoje Horvat var í morgun leystur frá starfi þjálfara þýska 1. deildarliðsins HSG Wetzlar eftir aðeins fjóra mánuði í starfi. Horvat mun eiga í viðræðum við annað lið. Það þótti forráðamönnum Wetzlar alls ekki viðunandi og sögðu þjálfaranum að pakka saman föggum sínum og hverfa á braut nú þegar.
Horvat tók við þjálfun Wetzlar í rétt fyrir miðjan desember. Þá eins og nú stóð liðið höllum fæti, í þriðja neðsta sæti þýsku 1. deildarinnar. Króatanum hefur sannarlega ekki tekist að snúa við gengi liðsins. Síðast tapaði Wetzlar á heimavelli fyrir næst neðsta liði deildarinnar, GWD Minden, 27:25, á laugardaginn. Er nú aðeins tveggja stiga munur á Wetzlar og GWD Minden.
Þetta er annað starfið sem Horvat missir á skömmum tíma. Hann var leystur frá störfum hjá króatíska karlalandsliðinu að loknu heimsmeistaramótinu í lok janúar í kjölfar þess að króatíska landsliðinu tókst ekki að tryggja sér a.m.k. sæti í forkeppni næstu Ólympíuleika.
