„Fyrst og fremst breyti ég til af því að mig langaði í meiri áskorun, komast í betra lið og spila um eitthvað annað en að halda sæti mínu í deildinni,“ segir Díana Dögg Magnúsdóttir landsliðskona í handknattleik í samtali við handbolta.is um væntanleg vistaskipti sína í sumar á milli þýsku liðanna Blomberg-Lippe og BSV Sachsen Zwickau. Díana Dögg er að ljúka sínu fjórða keppnistímabili með síðarnefnda liðinu.
Áhuginn vaknaði í desember
Blomberg-Lippe situr í fimmta sæti þýsku 1. deildarinnar og þar með talsvert ofar en Sachsen Zwickau. Díana Dögg segist fyrst hafa heyrt af áhuga forráðamanna Blomberg-Lippe í desember. Þegar kom inn á nýtt ár gengu hlutirnir fljótt fyrir sig. Penninn var dreginn fram og hripað var undir samning.
Díana Dögg verður þriðja íslenska landsliðskonan til þess að leika með Blomberg-Lippe. Hildur Þorgeirsdóttir og Karen Knútsdóttir léku með liði félagsins frá 2011 til 2013.
Allir enda hnýttir í lok janúar
„Í raun og veru var aðdragandin ekki langur. Blomberg hafði samband við mig í desember og vildi fá mig til sín. Ég skrifaði síðan undir samning í lok janúar, rétt áður en ég braut á mér hendina,“ sagði Díana Dögg sem er nýlega komin á fulla ferð aftur eftir handarbrotið.
Díana Dögg segir ljóst að hún sé að taka skref fram á við með skiptunum til Blomberg-Lippe. Hún er einnig mjög þakklát Sachsen Zwickau fyrir árin fjögur sem hafi reynst henni dýrmæt og þroskandi.
Meiri samkeppni
„Ég er mjög þakklát fyrir allt sem Zwickau gaf mér. Þar fékk ég mikinn spiltíma og öðlaðist mjög mikla og góða reynslu ásamt því að vera fyrirliði síðustu tvö ár. Engu að síður þykir mér bara kominn tími kominn til að taka næsta skref og takast á við nýjar áskoranir á handboltavellinum. Ég verð ekki ein í minni stöðu eins og síðustu þrjú ár hjá Zwickau.
Hjá Blomberg mun ég þurfa að sýna mig og sanna. En ég hlakka bara mikið til að takast á við þá áskorun og verða um leið enn betri leikmaður,“ sagði handknattleikskonan Díana Dögg Magnúsdóttir við handbolta.is í gær.
Sjá einnig: Díana Dögg ætlar að söðla um eftir leiktíðina
Díana Dögg er væntanleg til Íslands á sunnudaginn og mun í kjölfarið slást í hóp landsliðsins sem býr sig undir leiki við Lúxemborg og Færeyjar í undankeppni Evrópumótsins í 3. og 7. apríl.
