Magnús Stefánsson þjálfari karlaliðs ÍBV tekur við þjálfun kvennaliðs ÍBV fyrir næsta keppnistímabil. Sigurður Bragason, sem þjálfar nú meistaraflokkslið kvenna, lætur af störfum í vor. Þetta kemur fram í tilkynningu ÍBV handbolta í dag. Ekki kemur þar fram hvort Magnús haldi áfram störfum með karlalið ÍBV samhliða þjálfun kvennaliðsins.
Magnús hefur þjálfað karlalið ÍBV frá árinu 2023 er Erlingur Richardsson lét af störfum.
Sigurður hefur þjálfað kvennalið ÍBV frá 2018. Fyrsta árið ásamt Hrafnhildi Ósk Skúladóttur. Hin síðari ár hefur Hilmar Ágúst Björnsson verið hægri hönd Sigurðar. Undir stjórn Sigurðar varð ÍBV deildarmeistari í Olísdeildinni 2023 og einnig bikarmeistari sama ár. Lið félagsins hefur verið í fremstu röð og lék til úrslita við Val um Íslandsmeistaratitilinn vorið 2023 en laut í lægra haldi. Einnig lék ÍBV í Evrópubikarkeppninni um þriggja ára skeið og náði athyglisverðum árangri.
Um þessar mundir eru kynslóðaskipti að eiga sér stað hjá kvennaliði ÍBV sem situr í sjöunda og næst neðsta sæti Olísdeildar þegar liðið á fimm leiki eftir.
